குழந்தை வளர்ப்பு

சொல்ல முடியாத சோகங்கள்..

2011-09-06T06:07:00.000-07:00

இவை

சொல்ல முடியாத

சோகங்களின்

சேகரிப்பின் சுருக்கம் மட்டுமே !

நேரம் ஆகிவிட்டது!

தூரத்தில் அரட்டையடிக்கும்அலுவலர்கள்

எங்கள் மீது அமர்ந்துபணியாற்ற

தாங்களாய் ஏன்இன்னும் வரவில்லை ?

அரசு அலுவலக நாற்காலிகள்!

கும்பிட வந்தவர்கள்

நம்புகின்ற எங்களை

நிர்கதியாய் வெளியேகழற்றிவிட்டுவிட்டு

தர்ம்மமின்றி உள்ளேசென்றுவிட்டார்களே !

நாங்கள் செய்ததவறுதான் என்ன ?

காலம் காலமாய்

வாயிற்படியில்வருந்திக்

கிடக்கும் செருப்புகள்!

நிம்மதியாய் வாழவிடாமல்,

எங்களை அம்மணமாக்கி,

கண்ட இடங்களில்மண்டி யிடவைடவத்து

தண்டனைத் தருகிறீர்களே?

தெருவெங்கும் தங்கள்

சருமம் தெரியகூனிக்குறுகி

தேக்கமாகி துர்நாற்றம்வீசும்

சாக்கடைகள் !

நம்பினால் நலம்தரும் என்னை

அம்புகளால் துளைப்பதுபோல்

அலட்சியம் செய்துவிலக்கி வைக்கின்றார்களே

அழைத்தால் ஓடோடிவரகாத்திருக்கும்

உழைப்பின் ஏக்கங்கள்!

ஐயோ தாங்கமுடியவில்லையே

தயைகூர்ந்து எங்களைவிட்டுவிடுங்கள்

ஓய்வெடுக்க முதுமையிலும்எங்களுக்கு

விடுப்பும் வாய்ப்பும்கிடையாதா ?

தஞ்சமடைந்த தம்பதிகளான

லஞ்சமும் ஊழலும்!

நண்பர்களே.. இந்த பதிவு தங்களுக்கு பிடித்திருந்தால் மறக்காமல் தங்கள் கருத்துக்களையும்,வாக்குகளையும் பகிர்ந்து விட்டுப்போங்களேன்..

சொல்ல மறந்த வார்த்தைகள்...

2011-09-03T17:51:00.000-07:00

வணக்கம் பெற்றோர்களே நாம் ஒவ்வொருவரும் சொல்ல மறந்த வார்த்தைகள் அல்லது சொல்ல மறுக்கும் வார்த்தைகள்தான் என்ன? ஒரு பார்வை வீடியோவுடன்.

இன்று இந்தியாவில் கொண்டாடப்படும் ஆசிரியர் தினம்உயர்திரு.ராதாகிருஷ்ணன் அவர்களின் தயவால் ஆசிரியர்களுக்கு மரியாதை செலுத்துவதற்காககொண்டாடப் படுகிறது

நம் பிள்ளைகளை தம் பிள்ளைகளாக பார்த்து இந்த சமூகத்தில் மதிப்புமிக்கவராய் உயர்த்தும் ஆசிரியர்களுக்கும், நம் தாய் நாட்டில் தங்கள் கடமையை கண்ணும் கருத்துமாக செய்து கொண்டிருக்கும் ஒவ்வொருஆசிரியருக்கும் நன்றி சொல்லும் நேரமிது..

நன்றி நன்றி நன்றிகள் கோடி………

YES ! TEACHERS YOU MAKE A DIFFERENCE

டிஸ்கி :

1.இந்த பதிவை ர(ரு)சித்த பின், ஒரே ஒருகணம் நமக்கும் சொல்லித்தந்த ஆசிரியர்களுக்கு உள்ளுர நன்றி சொல்லிக் கொள்ளுவோம்

2.இந்த நன்றிகள் நம் வளரும் பிஞ்சுகளை போகப் பொருளாய் பார்த்த,பார்க்கும்,பார்த்துக் கொண்டிருக்கும் ஆசிரியர்களுக்கு அறவே இல்லை.

செருப்பு

2011-09-02T20:58:00.000-07:00

வெறுப்பை வெளிக்காட்ட
பொறுப்பாய்

கரத்தில் ஏந்தப்படும்

முரட்டு ஆயுதம் !

ஒரு மனிதனை

தனித்தனியாளாய் தங்கள்

தலையில் சுமக்கும்

இரட்டை சகோதரர்கள் !

தண்ணீரில் கண்டம் என்பதால்

அண்டி வந்து

கையில் தஞ்சம் புகுந்தாலும்

வெயிலுக்கு ஈடுதரும் தோழன் !

பிடித்தவர்களை மட்டுமே

கடித்துக் குதறி

பல்லில்லாமல்

கவ்வும் கா(வ)ல்காரன் !

மனிதர்கள் புழங்கும்

இடத்திற்குள் புகும் உரிமை

வழக்கமாகத் தனக்கு

மறுக்கப்பட்டாலும்

வெறுப்படையா வழித்துணை !

தெருக்களின் தூய்மை பற்றி

ஒருவருக்கும் அக்கறையில்லை

என்ற அடிப்படை உண்மையை

நினைத்து அடிக்கடி

புன்னகைக்கும் தாழ்மையின் சின்னம் !

அடுத்தவரை

கடுமையாக அடிக்க,

விருப்பம் இல்லாவிட்டாலும்

விளாசித்தள்ளும்

சூழ்நிலைக்கைதி!

நண்பர்களே.. இந்த செருப்பு தங்களுக்கு பிடித்திருந்தால் மறக்காமல் கருத்துக்களையும்,வாக்குகளையும் தாராளமாக வழங்கி விட்டுச் செல்லுங்கள்.அடுத்தவர்களும் இதை பார்க்க வரட்டுமே..

மழலைப்பருவம் கவனிக்க வேண்டிய விஷயங்கள்

2011-09-01T21:08:00.000-07:00

வணக்கம் நண்பர்களே…இன்றைய பதிவில் நாம்ஒவ்வொருவரும் கடந்து வந்த பருவத்தை நம் குழந்தைகளும் கடக்கும் பொழுது கவனிக்க வேண்டிய சில விஷயங்களை பார்ப்போம்.பொதுவாகவே மழலைப் பருவத்தில் குழந்தைகள் தாயிடம்தான் மிகுந்த ஒட்டுதலோடு இருக்கும். முதன்முதலாகபள்ளியில் சேர்க்கும் போது குழந்தைக்கும் ஏன் தாய்க்கும் மனது கஷ்டமாக இருக்கும். அதற்காக பள்ளியில்சேர்த்தது முதல் மரத்தடியில் உட்கார்ந்து கொண்டு, குழந்தைகளை கவனிக்கக் கூடாது. அதே போல் குழந்தைகள் வீடு திரும்பியவுடன் பள்ளியில்ஆசிரியர் அடித்தாரா, சகபிள்ளைகள் அடித்தனரா என எதிர்மறையான கேள்விகள் கேட்கக்கூடாது. உங்களின்ஆர்வக் கோளாறால், குழந்தைகள்தினமும் எதையாவதுசொல்ல ஆரம்பித்துவிடும். ஆசிரியர்கள் என்றாலே அடிப்பார்கள் என்ற சிந்தனைமனதில் பதிந்து விடும்.

ஒன்றாம் வகுப்பு வரை,பிள்ளைகளிடம்படிப்பைப் பற்றி அதிகம் பேசவேண்டாம். அந்த வயதில் சகபிள்ளைகளுடன் இயல்பாகபழகுகின்றனரா, நல்லபழக்கவழக்கங்களை கற்றுக் கொள்கின்றனரா என்று கவனிக்கலாம். ஒவ்வொருபிள்ளைகளுக்கும் தனித் திறமை இருக்கும். மூன்று வயதுகுழந்தைக்கும், மூன்றேகால் வயது குழந்தைக்கும்கூட அறிவின் தன்மை வித்தியாசப்படும். மேலும் வகுப்பில் உள்ள அனைத்து குழந்தைகளும் ஒரே வயதாகஇருந்தாலும், சிலமாதங்கள் வித்தியாசம் இருக்கும். எனவே பக்கத்து வீட்டுபிள்ளைகளுடனோ, உடன்பிறந்தவர்களுடனோ படிப்பை, மதிப்பெண்ணைஒப்பிட்டு பேச வேண்டாம்.

குழந்தைகள் இரண்டாம்வகுப்பு படிக்கும் போதே, டாக்டராக வேண்டும்,இன்ஜினியராக வேண்டும்என திணிக்காதீர்கள். அது தவிர எவ்வளவோ துறைகள் நிறைய உள்ளனஒவ்வொருவருக்கும்ஒவ்வொரு துறையில் ஈடுபாடு, திறமைஇருக்கும். அத்திறமையை கண்டறிந்து, அதைநோக்கிபிள்ளைகளை முன்னேற்ற வேண்டும். பத்தாம் வகுப்பு படிக்கும் போது இயல்பாக விட்டுவிட வேண்டும்.

நடனம், பாட்டு, இசை, விளையாட்டில் பிள்ளைகள் ஆர்வமாகஇருந்தால் கூட, பத்தாம்வகுப்பு, பிளஸ்2வில் அனைத்தையும்நிறுத்தி விடுகின்றனர் பெற்றோர். இது பிள்ளைகள் மனதில் அதிகமனச்சோர்வையும், படிப்பின்மீதான ஆர்வத்தையும் குறைத்துவிடும். ஓயாமல் படி, படி என்று சொல்வதை விடுத்து அவர்களுக்கு தேவையானதை செய்தால், அவர்களுக்கும் பதட்டம் இருக்காது.பெற்றோரும் நிம்மதிபெறலாம்.

நண்பர்களே இந்த பதிவு தங்களுக்கு பிடித்திருந்தால் மறக்காமல் வாக்களியுங்கள்.

தாயுள்ளம்

2011-08-31T21:33:00.000-07:00

மார்பிலே தவழவிட்டு

மகனோடு கொஞ்சுகிறான்

என் மகன்!

இப்படித்தான் அவனை

ஈரமுடன் நான் வளர்த்தேன்!

எப்படித்தான் மறந்தானோ…

என்னை இன்று துரத்திவிட்டான்!

முதுமையில் தனிமையாய்

வறுமையின் கொடுமையோடு

தள்ளாடித் தவித்தபோதும்

விழிகள் பரபரக்கும்

தூரத்தில் நின்றேனும்

ஒருமுறை என் மகனைக் காண!

பிரார்த்தனை

வேறொன்றுமில்லை

கடைசிவரை கைவிடாமல்

பேரனாவது காக்க வேண்டும்

என் மகனை!

பணத்தின் மதிப்பை பயிற்றுவிக்கும் வழிகள்

2011-08-30T20:55:00.000-07:00

வணக்கம் பெற்றோர்களே.பணத்தின் அருமையை நாம் உணர்ந்து இருக்கிறோம்.எனினும் நம் குழந்தைகளுக்கு அதைப்பற்றி உணர்த்தினால் தான் வருங்காலத்தில் நம் குழந்தைகள் வளமாக இருப்பார்கள்..இதை எப்படி செய்வது ? எங்கே கேட்பது என்று யோசிக்க வேண்டாம்.அவர்கள் ஆசைப்பட்டதை பரிசீலனை செய்து வாங்கித்தரும்போதே உண்மையயை உணர்த்துங்கள்.

பணத்தின் அருமையை உணர்ந்திருப்பது என்பது செலவே செய்யாமல் சேமித்து மட்டும் வைப்பது என்று அர்த்தம் அல்ல. ஒரு பொருளை அதன் சரியான விலையில் வாங்குவது, ஆசைப் படுவதையெல்லாம் வாங்கிக் கொண்டிருக்காமல் தேவைப்படுபவற்றை மட்டும் வாங்குவது, திட்டமிட்டு செலவு செய்வது என்று இதற்கு இலக்கணம் வகுத்துக்கொண்டு போகலாம்.
குழந்தைகளுக்கு பணத்தின் அருமையை ஏன் உணர்த்த வேண்டி வருகிறது? விலை உயர்ந்த பல பொருட்களை சீக்கிரத்தில் உடைத்து விடுகிறார்கள். தொலைத்துவிடுகிறார்கள். அல்லது இப்பொழுதே வாங்கிக்கொடு என்று அடம் பிடிக்கிறார்கள். இல்லையா?

பணம் என்பது அப்பாவுக்கு மாதா மாதம் கிடைக்கிறது என்பது தெரிகிறதே, தவிர அதற்கு எப்படி எல்லாம் உழைக்க வேண்டியிருக்கும் என்பது குழந்தைகளுக்கு தெரியவில்லை.உங்கள் குழந்தைகள் ஏதாவது ஒரு பொருளை வாங்கித்தரச் சொல்லிக் கேட்டால் அல்லது உங்களுக்கு ஒன்றை வாங்க வேண்டும் என்று ஆசை இருந்தால் அது உங்கள் எத்தனை மணி நேர உழைப்பு என்று கணக்குப் போட்டுப் பாருங்கள்.

ஒரு செல்போன் வாங்க விரும்புகிறீர்கள். விலை பத்தாயிரம் ரூபாய். உங்கள் மாத சம்பளமோ இருபதாயிரம்தான் என்றால் செல்போனின் மதிப்பு உங்கள் 15 நாள் உழைப்பு. இப்படி கணக்கு போட்டுப் பார்த்தால் அதை அவசியம் வாங்கித்தான் ஆக வேண்டுமா என்ற எண்ணம் வரும்.
இதை குழந்தைகளிடம் சொன்னால், வாங்கிக் கொடுத்த பொருளை பத்திரமாக வைத்துக் கொள்ள வேண்டும் என்ற எண்ணம் வரும்.

மேலும் வளரும் விரைவில்..

நண்பர்களே இந்த பதிவு தங்களுக்கு பிடித்திருந்தால் மறக்காமல் வாக்களியுங்கள்.

தாய்மை..

2011-08-29T06:58:00.000-07:00

களங்கமற்ற

வளர்பிறையாய்

சீரோடு விளையும்

ஆரோகண அன்பு!

ரத்தத்தை

தித்திக்கும் அமுதாக்கும்

புடமிட்ட

உடல் தொழில்நுட்பம்!

புதிய வரவை

பதியமிட

ஆற்றலாய்

ஊற்றெடுக்கும்நாற்றாங்கால்!

உயர்ச்சி விரும்பிய

இயற்கையின்

தளராத முயற்சிபரிசளித்த

அளவற்ற ஆனந்தம்!

அன்பு

இன்புற்று அரசாளும்

ராஜ்ஜியத்தில்

வீட்சியற்ற ஆட்சிப்பீடம்!

இயற்கையின் மடியில்

உயர் பதவியின்விருதாய்

பணிவுடன்

அணிவிக்கப்பட்டமணிமகுடம்!

இச்சையும்

கொச்சையும்

வித்திடும் வக்கிரங்கள்

மத்தியில்

தனித்துவ உணர்வாய்

புனிதம் புனைந்தமனிதம்!

தசை வளர்ச்சிக்கு

விசையூட்ட

தன் மூச்சையே தானமிடும்

ஆச்சரியமூட்டும் பாசம்!

மண்ணில் திரியும்

எண்ணற்ற உயிர்களின்

சாயமான

தூய நேயத்தின்

நிச்சய உச்சநிலை!

நண்பர்களே இந்த பதிவு தங்களுக்கு பிடித்திருந்தால் மறக்காமல் ஓட்டளியுங்கள்.

ஆங்கிலப் பள்ளி..

2011-08-28T05:50:00.000-07:00

கற்றை கற்றையாய் பணம்தரும்

பெற்றோர்களையும்

எல்லையின்றி படிக்கவைக்கும்

தொ(ல்)லை தூரக்கல்வி!

சும்மா இருக்கும்

அம்மாக்களை

மாலைநேர ஆசிரியர்களாக்கும்

வேலை வாய்ப்புஅலுவலகம்!

கணம் தோறும்

பண அறுவடையில்

முன்னிலை வகிக்கும்

கான்கிரீட் வயல்!

நொறுக்குத் தீனிக்கு

செறுக்கு உண்டாக்கிய

பாலகர் வெறுக்கும்

பலகார பண்டகசாலை!

குட்டி வாகனத்தில்

சுட்டிக் குழந்தைகளைஅடைத்து,

சுலபமாய் வலம்வரவைக்கும்

உலக மகா சர்க்கஸ்!

வாட்டும் சூரியன்வதைத்தாலும்

கோட்டு,சூட்டு,டை.ஷுமாட்டிவிட்டு

மழலைகளை அழ(கூட்டி)விடும்

குழந்தைகள் அழகுநிலையம்!

நாளை நம் குழந்தைகளும் சாதிக்க...

2011-08-27T20:34:00.000-07:00

வணக்கம் பெற்றோர்களே.என்ன உங்கள்
குழந்தைகளின் எதிர்கால பாதுகாப்பிற்கான பரிசை கொடுத்துவிட்டீர்களா? வாருங்கள் இன்று
நம் குழந்தைகளும் நாளைய உலகத்தில் சாதிக்க நாம் என்ன செய்யவேண்டும் என்பதை பார்ப்போம்.

ஒரு குழந்தைக்கு, தன்னைப் பற்றிய அபிப்ராயமும்,
தன் தகுதிகள் குறித்த அறிமுகமும் பெற்றோர்களின்
பாராட்டிலிருந்தோ கண்டிப்பில் இருந்தோ பிறக்கிறது. சின்னத்தவறொன்றுக்கு
“அதை செய்வியா? இதை செய்வியா?”
என்று தலையில் குட்டு வாங்கும்போது
குட்டு, தலையில் பதிகிறது. ஆனால்
தான் எதற்கும் லாயக்கில்லை
என்கிற எண்ணம் மூளையில் பதிகிறது.
அக்கறையாலும் அன்பாலும், குழந்தை திருந்த வேண்டும்
என்ற தவிப்பிலும்தான் எல்லாப் பெற்றோரும் கண்டிக்கிறோம்.
ஆனால் குழந்தைகள் மனதில் என்ன பதிவை
விடுகிறோம் என்பதுதான் முக்கியம்

.

தாங்கள் பிறந்து வளர்ந்த குடும்பம்
– பாரம்பரியம் குறித்தெல்லாம் குழந்தைகள் தெரிந்து கொள்வது முக்கியம். தாத்தா
பாட்டி அவர்களுக்கும் முந்தைய தலைமுறை- அவர்கள்
செய்துவந்த தொழில் – அவர்களுடைய ஆளுமை – அவர்கள் வாழ்வில்
நடந்த சுவையான சம்பவங்கள் போன்றவை
குறித்தெல்லாம் குழந்தைகளுக்கு உற்சாகமாக சொல்லுங்கள். தன்னுடைய பரம்பரை குறித்த அறிவு
மனதுக்குள் மிகுந்த நம்பிக்கைய வளர்க்கும்.
ஒரு வேளை முன்னோர்கள் சிரமப்பட்டு
உயர்ந்திருந்தால்கூட அவர்கள் கதையே ஒரு
முன்னுதாரணமாய் அந்த இளம் இதயங்களில்
நிலைக்கும். கடந்த கால உறவுகள்
பற்றிய தகவல்களும், நிகழ்கால உறவுகள் உடனான நேரடி
அறிமுகமும் குழந்தைகளுக்கு மிகவும் அவசியம். “எங்கே
சார்! உறவுகள் வந்தால் ஓடி
ஒளிந்து கொள்கிறார்கள்!” என்று நீங்கள் கேட்கலாம்.

குழந்தைகள், தங்களை உரிய மன
முதிர்ச்சியுடன் நடத்த வேண்டும் என்று
ஓரளவு விவரம் வந்த பிறகு
விரும்புவது இயற்கை. இது நியாயமும்
கூட. நாம் பச்சைக் குழந்தைகளைக்
கொஞ்சும்போது அவர்கள் மொழியில் பேச
ஆசைப்பட்டு “அப்புக்கண்ணா! புஜ்ஜுக்குட்டி” என்று கொஞ்சுகிறோம். கொஞ்சம்
வளர்ந்த குழந்தைகளிடம் நாம் பெரியவர்கள் என்ற
வீராப்பைக் காண்பிக்கப் படாதபாடுபடுவோம்.

குழந்தைகளிடம் இயல்பாக, இனிமையாக நீங்கள் விருந்தினர்கள் முன்னிலையில்
நடந்து கொண்டால் விருந்தினர்களும் அதுபோல் நடந்து கொள்வார்கள்.
வீட்டுக்கு வருபவர்கள் பலரும், ஏதோ விசாரணைக்
கமிஷன் நீதிபதிகள் போல் குழந்தைகளிடம் பரீட்சை
பற்றியும் மதிப்பெண் பற்றியும் மட்டுமே கேட்பார்கள். இவை
தவிர குழந்தைகளின் உலகத்தில் எத்தனையோ விஷயங்கள் இருக்கின்றன. எனவே குழந்தைகளை இயல்பாக
நடத்துங்கள். விருந்தினர்களும் அப்படியே நடந்து கொள்வார்கள்.பகலில், என்ன விஷயமாக நீங்கள்
பிள்ளைகளைக் கண்டித்திருந்தாலும் சரி, இரவு உறங்கப்
போகும் முன்னால், அந்தக் குற்றவுணர்வை மாற்றிவிடுங்கள்.
சிரித்துப் பேசியோ, சினிமா போன்ற
விஷயங்கள் குறித்து ஜாலியான ஒரு விவாதத்தை
நடத்தியோ பிள்ளைகளை இயல்பு நிலைக்குக் கொண்டு
வாருங்கள்.

சுதந்திரம் குழந்தைகளுக்கு சரியாக வழங்கப்படும்போது அதுவே
சுய கட்டுப்பாட்டையும் உருவாக்கிவிடும். விளையாட்டுக்கான நேரம் படிப்புக்கான நேரம்
என்பதில் பல பெற்றோர்கள் தவறு
செய்வார்கள். மாலை ஐந்து முதல்
ஆறு, விளையாட்டுக்கான நேரம் என்று வைத்துக்கொள்ளுங்கள்.
ஐந்து மணிக்கு விளையாடப் போகும்போதே
“ஆறு மணிக்குப் படிக்க வரணும்! தெரியுமில்லே”
என்று பயமுறுத்தி அனுப்பினால், ஆறுமணிக்கு வருவதை ஆனவரை தள்ளிப்
போடவே குழந்தைகள் விரும்பும். படிப்பைப் போலவே மற்ற திறமைகளும்
முக்கியம் என்பதைப் பெற்றோர்கள் உணர்ந்து கொள்வதும், உணர்த்துவதும் முக்கியம்.

சின்னச் சின்ன அக்கறையிலேயே குழந்தைகள்
மகிழ்ந்துவிடுவார்கள். வெளியே சொல்ல மாட்டார்களாக
இருக்கும். ஆனால் மனதுக்குள்ளே மகிழ்வார்கள்.
தங்களைத் தாங்களே திருத்திக் கொள்வார்கள்.
உங்கள் எதிர்பார்ப்பில் இருக்கிற நியாயத்தைப் புரிந்துகொண்டு தங்களை சீரமைத்துக் கொள்வார்கள்.

நண்பர்களே இந்த பதிவு தங்களுக்கு பிடித்திருந்தால் மறக்காமல் ஓட்டளியுங்கள்.

குழந்தையின் எதிர்கால பாதுகாப்பிற்காக நாம் தரவேண்டிய பரிசு.

2011-08-26T06:54:00.000-07:00

இது இன்சூரன்ஸ் பாலிஸி
எடுப்பது அல்ல நண்பர்களே ! குழந்தைகளின் எதிர்கால பாதுகாப்பிற்காக நாம் கற்றுக்கொடுக்க வேண்டிய தகுதிகள் என்ன எப்படி அதனை கற்றுத்தருவது. ஓர் பார்வை.

அன்பு பெற்றோர்களே, இன்றைய சூழ்நிலையில்வருமானத்திற்கேற்ப செலவு செய்த காலம்
போய் இந்த மாதம் என்ன செலவு என்று முடிவு
செய்துவிட்டு அதற்கான வருமானம் தேடி ஓடுகிற கால கட்டாயத்திற்கு வந்துவிட்டோம்.அடிப்படை தேவைகள் வீடு,
உடை, உணவு என்றிருந்த நிலை மாறி கார்,
கிரெடிட் கார்டு,
மாடர்ன் செல்போன்,
கேபிள் டிவி என மாறி
வருகிற உலகத்தில் பொருளில்லார்க்கு வாழ்க்கை இல்லை என்றே
ஆகிவிட்டது.
இதையெல்லாம் புரிந்து கொண்டு சில புதிய தகுதிகளை நம் குழந்தைகளிடம்
ஏற்படுத்தாவிட்டால் நாம் நம்
குழந்தைகளுக்கு தவறு இழைத்தவர்களாகிவிடுவோம்.

நிறைய பெற்றோர்கள்,
தங்கள் குழந்தைகளின்
எதிர்கால பாதுகாப்பிற்கு, நிறைய
பணம் சேர்த்து வைக்க வேண்டும் என்று நினைக்கிறார்கள். உண்மையில் எதிர்கால
பாதுகாப்பிற்கு பெற்றோர் செய்ய வேண்டியது, ‘பணத்தை நிர்வகிப்பது எப்படி?’ என்று
கற்றுக்கொடுப்பதுதான்.

உலகத்தின் கோடீஸ்வரராக
இருந்த வாரென் பபெட் தன் சொத்தின் பெரும்பகுதியை
பில்கேட்ஸ் நடத்தும் சமூக சேவை அமைப்புக்கு நன்கொடையாக கொடுத்துவிட்டு
சொன்ன வார்த்தைகள் ; ‘எதுவுமே செய்ய வேண்டியதில்லை என்கிற அளவிற்கு நான் என்
குழந்தைகளுக்கு சொத்தை வைத்துவிட்டு போக விரும்பவில்லை. ஏதாவது
செய்ய வேண்டும் என்று நினைக்கிற அளவிற்கு மட்டுமே சொத்தை வைத்து விட்டு
போக விரும்புகிறேன்’என்று கூறியுள்ளார்.ஆக தன் குழந்தைகளுக்கு பணத்தை விட,
வாழ்க்கையை
எதிர்கொள்ளும் திறனைத்தான் வழங்க விரும்புகிறார் என்றால் நாமும் செய்ய வேண்டியது அது தானே.

நல்லதொரு கல்வி
நிறுவனத்தில் படிப்பதும் மதிப்பெண் பெறுவதும் மட்டுமே வாழ்வில் வெற்றி பெற போதாது என்பதை
பெற்றோர்கள் உணர வேண்டும்.நிதி நிர்வாகத்திறனை பள்ளி மற்றும் கல்லூரிகளில் மட்டுமே
படித்து
கற்றுக்கொண்டுவிட முடியாது. எவ்வளவுதான் படித்தாலும் பணத்தை கையாளுவதென்பது
பழக்கத்தில் வருவதுதான்.
படிக்கிற வயசில் பணத்தை கொடுப்பதா? என்று
யோசிக்காதீர்கள். ஏனெனில் பரீட்சைக்கு முதல் நாள் மட்டும் படித்துவிட்டு
எப்படி நல்ல மார்க் வாங்க முடியாதோ அதே போலத்தான் பண நிர்வாகத்தை
தொழில் அல்லது வேலைக்கு போன பிறகு தானாக கற்றுக்கொள்ளட்டும் என்று
நினைப்பது.

பந்தய நாளிற்கு முதல்
நாள் மட்டும் பயிற்சி எடுத்தால் எந்த பந்தயத்திலும் ஜெயிக்க முடியாது.
வாழ்க்கைப் பந்தயத்திலும் அப்படித்தான். எனவே குழந்தைகள் வளரும் போதே
அவர்களுக்கு நிதி நிர்வாக உத்திகளை கற்றுத் தருவது நிச்சயம் அவர்கள் வாழ்வில் மிகப்பெரிய
வெற்றிகளைப் பெற உதவும்.

இன்றைய குழந்தைகளுக்கு நல்ல விஷயத்தை கற்றுக்கொடுப்பது என்பது
சாதாரண விஷயமில்லை. அதற்கு மெனக்கெட வேண்டும்.

சேமிக்கும்
பழக்கத்தை ஏற்படுத்துவதற்காக நாமும் சிறிது
முயற்சிக்கலாமே…

இன்னும் வளருவோம்…

தேவைதானா இந்த லோக்பால் சட்டம் ?

2011-08-24T06:52:00.000-07:00

எங்கும் ஊழல் எதிலும் ஊழல்.இந்தியா இவ்வாறிருக்கையில் இந்த லோக்பால் சட்டம் தேவைதானா ?

இன்றைய சூழ்நிலையில் ஊழல்களே மிகப்பெரிய கவலை தரும் பிரச்னையாக மக்கள் மத்தியில் உள்ளது. ஊழலை மேலும் வளர விடாமல் தடுக்க, ஊழல் செய்வோரை கட்டுப்படுத்த கறாரான லோக்பால் சட்டத்தை கண்டிப்பாக கொண்டு வர வேண்டும்.வெளி நாடுகளில் ஊழல் குற்றவாளிகள் யாராக இருந்தாலும், உயர்ந்த பதவிகளில் இருந்தாலும் கண்டிப்பாக தண்டிக்கப்படுகின்றனர். ஆனால் நம் நாட்டில் ஊழல்வாதிகள் தைரியமாக ஊர் சுற்றி வருகிறார்கள்

அன்னா ஹசாரேயின் ஊழல் ஒழிப்பு இயக்கம், இரண்டாவது சுதந்திரப் போராட்டமாக எழுச்சி பெற்றிருக்கிறது. இந்திய மக்கள் அனைவரும் ஒன்று திரண்டு, ஊழலுக்கு எதிராக போர்க்கொடி தூக்கியிருக்கின்றனர். இதை

உணராமல், அரசும் அதன் அமைச்சர்களும், பாராளுமன்றத்தின் உரிமைகள், சட்டத்தின் மாட்சி என முழங்கிக் கொண்டிருக்கின்றனர்.ஆனால் நாளொருமேனியும், பொழுதொரு வண்ணமுமாக , பாரளுமன்றத்தினை அவமதிப்பதும், அலங்கோலப்படுத்துவதும், அமைச்சர்களும், அரசியல்வாதிகளும் தான். அவர்களுக்கு ஒரு பாடம் கற்பிக்க வேண்டியது, காலத்தின் கட்டாயமாகும்.

இன்று அரசியல்வாதிகள் கையில் எடுத்திருக்கும் கடைசி ஆயுதம் தேர்தல். மக்கள் ஆட்சியில் தேர்தல் மூலம் தான் எதையும் மாற்ற வேண்டும் என்கிறார்கள். இன்றைய சூழலில், தேர்தலில் எவ்வளவோ தில்லு முல்லுகள், வன்முறைகள், லஞ்சம், அதிகார துஷ்பிரயோகங்கள் நடப்பதை கண்கூடாக காண்கிறோம்.நடந்து முடிந்த தமிழக தேர்தலில் கோடி கோடியாய் கணக்கில் வராத பணம் கண்டுபிடிக்கப்பட்டதை இந்த நாடறியும். ஆக பணம் வாரி இறைத்தால் மட்டுமே வெற்றி பெற முடியுமென்ற விந்தையான தேர்தல் முறை நம்முடையதாக இருக்கிறது.இப்படியிருந்தால் நல்ல சமூக சிந்தனையாளர்கள், தேர்தலில் வெற்றி பெற்று வருவது அரிதிலும் அரிது. மக்கள் போராட்டத்தின் மூலமே அரசியல் ஊழல்களையும், லஞ்ச லாவண்யங்களையும் மாற்ற முடியும். அதற்கான தருணம் இதுவே ...வருங்கால இந்தியா வளமாகட்டும்.

இதுவரை நடந்த ஊழல்கள் ஓரு பார்வை..

மேலும் இது பற்றிய தகவல்களுக்கும் தங்களதுமேலான ஆதரவிற்கும் இங்கே சொடுக்கவும்

வாருங்கள் வலிமையான சட்டத்திற்கு ஆதரவளிப்போம்.நம்மாலும் முடியும்

அடம் பிடிக்கும் குழந்தையை அரவணைக்க...

2011-08-23T07:34:00.000-07:00

நம் ஒவ்வொருவரது வீட்டிலும் குழந்தைகள் நேரம் காலம் தெரியாமல் அடம்பிடிப்பார்கள்.அவர்களை எப்படி அரவணைப்பது என்பதை இன்று காண்போம்.பொதுவாக குழந்தைகள் எதற்காக அடம்பிடிக்கிறார்கள்?.இதன் காரணங்கள்...

1.நியாயமான தேவைக்காக..(பசியின் போது பாலுக்காக).

2.தன் விருப்பத்திற்காக (விளையாட்டு
பொம்மை மற்றும் பிறவற்றைப் பார்த்து அழுதல்).

3.அநியாயத்திற்கு அடம்பிடித்தல்
(காய்ச்சலில் சிகிச்சை பெறும்போது

ஐஸ்கிரீமுக்காக அழுதல்,
கண்ணில் பட்ட விளம்பரத்தைப் பார்த்ததும் அது கெட்டதாகவே இருந்தாலும் அதைப் பெறுவதற்கு அழுதல்).

இப்படி குழந்தைகள் எதற்கென்றே தெரியாமல்
எதற்கெடுத்தாலும் அடம்பிடிக்கும் பிரச்சினைக்கு சில தீர்வுகள்..

முதலாவதான நியாயமான
தேவைகளை மறுக்கவே கூடாது. பெற்றோருகளுக்கு இயலாத போதும்
ஏதாவது ஒரு வகையில் கொடுத்து திருப்தியடைய செய்தே ஆக வேண்டும்.

இரண்டாவது காரணத்தில் பணத்தின்
அருமையை புரிய வைக்க வேண்டும். குழந்தை கேட்பது நியாயமானதாக இருந்து
அதை வாங்கித் தருவதானாலும் அதைப் பெறுவதற்காக பணம் எவ்வளவு? அதற்கு எத்தனை நாட்கள் உழைக்க வேண்டும் என்பதைச்
சொல்ல்லாம்.அல்லது அதை வாங்கித் தருவதனால்,அதற்கு சில வேலைகளை செய்யுமாறும் தூண்டலாம். உதாரணத்திற்கு செடிகளுக்கு தண்ணீர்
விடுதல், துணிகளை துவைத்தல்,
சமையலுக்கு உதவுதல்
போன்றவைகளைச் செய்யச் சொல்லலாம்.இதனால் பிள்ளைகளுக்கு பணத்தின் அருமை புரியும். அதன்
மூலம் அவர்களுக்கும் சுயமாக சம்பாதிக்கும் மன உணர்வு பெருகும்.தம்மிடம் பணம் இருக்கிறதென்பதற்காக பிள்ளைகள்
ஆசைப்படுவதையெல்லாம் வாங்கி தருகின்ற
பெற்றோர்கள்தான் ஊதாரித்தனத்தை மறைமுகமாக கற்றுத் தருகிறார்கள்.

மூன்றாவது காரணத்தில் மிகுந்த கவனமாக இருத்தல் வேண்டும். பிள்ளை
கேட்பதில் முற்றிலும் தவறானது என்ற முடிவடுத்து விட்டால் “வாங்க முடியாது” என்று தெளிவாகச் சொல்லிவிட வேண்டும்.உடனே
அழுதல், சண்டையிடுதல்,
உருகுதல் போன்ற
வேஷங்கள் நடைபெறும்.அப்போதும் முடிவை மாற்றக்கூடாது. “அவை உனக்குக் கெடுதல் தரும்” என்பதை மட்டும் வலியுறுத்தலாம்.சில
நேரங்களில் சுற்றி உள்ள பிற மனிதர்களைக் கவரும் வண்ணம் ஆர்ப்பாட்டம் நடைபெறும். பெற்றோருக்கும்
“சரி போனால் போகட்டும்
விட்டு விடலாம்” என்ற மனநிலை
வரும். ஆனால் அப்போதும் வளைந்து கொடுக்கக்கூடாது. மறுப்புச் சொல்லிவிட்ட பிறகு அதில்
உறுதியாக இருக்க வேண்டும். இந்த உறுதியில்லா விட்டால் தவறான
விஷயங்களையும் அடம்பிடித்துச் சாதிக்கலாம் என்ற மன உணர்வு உருவாகிவிடும். இதைச்
செய்யும்போது குழந்தைகள் மீது இரக்கம் இல்லாத கல் நெஞ்சமா? என்கிற அளவிற்கு சூழ்நிலை அமையும். இருப்பினும்
அது பிள்ளையின் நன்மைக்கே என்பதால் மறுப்பிலிருந்து மாறக்கூடாது.

இறுதியாக பெற்றோர்கள்
வீட்டைவிட்டு வெளியில் சென்று திரும்பி வரும் போதெல்லாம் தவறாமல் எதையாவது வாங்கி
வருவது போன்ற பழக்கங்களை மாற்ற வேண்டும். அப்பபழக்கத்தால் எப்போதும் எதையாவது
எதிர்பார்க்கும் மன நிலை பிள்ளைகளுக்கு வந்துவிடும்.எனினும் வெளி ஊரோ அல்லது வெளிநாடோ
சென்று திரும்புகையில் எதையாவது
வாங்கி வருவதில்
தவறேதும் இல்லை.

சென்ற பதிவில் பதிவிட்ட வீடியோவிற்கு கருத்துரை வழங்கிய அனைத்து நல் உள்ளங்களுக்கும் மிக்க நன்றி.. நன்றி..

குழந்தைகளின் நல்ல நண்பன் யார் ?

2011-08-22T07:17:00.000-07:00

இந்த கேள்விக்கு விடை தேடினால் வரும் பதில் புத்தகம் என்பது யாரலும் மறுக்க முடியாத உண்மையே.அவர்களிடம் புத்தக வாசிப்பை கொண்டுவருவது எப்படி ? என்பது பற்றி பார்ப்போமா…

புத்தகம் என்றாலே இந்த காலத்துக் குழந்தைகள் அலறியடித்துக் கொண்டு ஓடுகிறார்களே, அவர்களிடம் பாடப் புத்தகத்தை படிக்கச் சொல்வதே கஷ்டமாக இருக்கிறது. இதில் மற்ற புத்தகத்தை வேறா? என்று கேட்கிறீர்களா? பாடப்புத்தகம் தேர்வு சம்பந்தப் பட்டது. மனப்பாடம் செய்தே ஆக வேண்டிய கட்டாயம். ஆனால் மற்ற புத்தகங்கள் அப்படி இல்லையே. நல்ல பழக்கத்தை ஏற்படுத்தப் போகிறோம் என்ற நம்பிக்கையோடும் கொஞ்சம் உற்சாகத்தோடும் முயற்சியை துவங்குங்கள்.

பெற்றோற்களே முதலில் உங்கள் வீட்டில் புத்தக அலமாரியை அமையுங்கள். இதனை அமைப்பதற்காகவே புத்தகம் வாங்குவீர்கள். வாங்கிவிட்டோமே என்று படிக்க ஆரம்பிப்பீர்கள். அப்பா(மா) படிக்கிறாரே என்று மெல்ல மெல்ல குழந்தைகளும் புத்தகங்களை தொட ஆரம்பிப்பார்கள்.பெற்றோர்கள் ஆபிஸ் டென்ஷன், பிஸினஸ் டென்ஷன், அல்லது வீட்டு வேலையெல்லாம் முடிச்சிட்டு கொஞ்சம் ரிலாக்ஸ் என ஏதாவது காரணம் சொல்லி அவர்கள் டிவியில் உட்கார்ந்துவிடுகிறார்கள். உண்மையில் ரிலாக்ஸ், புத்தகங்களில் ஏற்பட வாய்ப்பு உண்டே தவிர டிவியின் மூலம் அல்ல. மேலும் பிஸினஸ் டென்ஷனுக்கு டிவி பார்ப்பதால் டென்ஷனை தள்ளிப்போடலாமே தவிர தீர்வுகள் எதுவும் கிடைக்கப்போவதில்லை. ஆனால் அந்த நேரத்தில் அவர்கள் துறை சார்ந்த புத்தகங்களை படித்தால் தீர்வுகளும் கிடைக்கும், டென்ஷன் நீங்கி தெளிவும் ஏற்படும். எனவே, நீங்களும் டிவிக்கு பதிலாக புத்தகம் படிக்கும் பழக்கத்தை கடைப்பிடியுங்கள்.இந்த பழக்கம் அவர்களுக்கும் கண்டிப்பாக வரும்.

அடுத்து, படித்து முடிக்காமல் ஒரு புத்தகத்தை அலமாரியில் வைப்பதில்லை என்று முடிவெடுங்கள். படித்து முடிக்கும் வரை அது கண்ணில் படுகிற இடத்திலேயே இருக்க வேண்டும். அப்பொழுதுதான் படிக்க வேண்டும் என்ற எண்ணம் ஏற்படும். இதையே உங்கள் குழந்தைகளையும் பின்பற்றச் சொல்லுங்கள்.குழந்தைகளுக்கு காமிக்ஸ் புத்தகங்களும் மற்றவர்களுக்கு வயதிற்கு ஏற்றவாறு ஜோக்ஸ் அல்லது புதிர்கள், குட்டிக்கதைகள் அடங்கிய புத்தகங்கள், படிக்கும் பழக்கத்தை ஏற்படுத்துவதை எளிதாக்கும்.

அவர்களுக்கு பிடித்த துறையில் வெற்றி பெற்றவர்களின் கதைகளை வாங்கிக் கொடுங்கள். படிக்கும் பழக்கத்தை தொடங்குவதற்கு எளிதாக இருக்கும். உதாரணத்திற்கு கிரிக்கெட் பிடிக்கும் என்றால் சச்சின் மற்றும் திராவிட் ஆகியோரது சுயசரிதைகளை வாங்கிக் கொடுங்கள்.மேலும் குழந்தைகளின் பிறந்த நாளுக்கு புத்தகங்களையே பரிசாக வாங்கிக் கொடுங்கள். ஆடை அந்த நாள் மட்டும்தான் பொலிவை தரும். ஆனால் நல்ல புத்தகங்கள்தான் வாழ்நாள் முழுவதும் பொலிவோடு இருக்கச் செய்யும். மற்ற பொது நிகழ்ச்சிகளுக்கும் நல்ல புத்தகங்களை தேர்ந்தெடுத்து பரிசளியுங்கள்.சினிமா தியேட்டர், ஹோட்டல்களுக்கு பதில் குழந்தைகளை புத்தக கடைகளுக்கு அழைத்துச் செல்லுங்கள். புத்தகக் குவியலை பார்க்கும்போது நாம் படிக்க வேண்டியது எவ்வளவு இருக்கிறது என்றும் இதை பார்க்கையில் நம் பள்ளிப் பாடங்கள் ஒன்றுமில்லை என்று எண்ணுவார்கள் அல்லது நாம் கற்க வேண்டியது இன்னும் இருக்கிறது என்று எண்ணுவார்கள்.

ஒரு புத்தகத்தை எடுத்ததும் பத்து பக்கமாவது படித்தால்தான் டிவி அல்லது விளையாட்டு அனுமதி என்ற முறை கொண்டு வாருங்கள். ஆரம்பத்தில் அலுத்துக் கொண்டே படித்தாலும் படிப்பதில் உள்ள சுகம் விரைவிலேயே அவர்களுக்கு புரிந்துவிடும்.உணவு நேரம், டிவி நேரம் போல புத்தகம் படிக்கவென்றும் குடும்பத்தில் உள்ள அனைவருக்கும் ஒரு பொதுவான நேரம் ஒதுக்குங்கள். எல்லோரும் உட்கார்ந்து படிக்கும் போது குழந்தைகளும் ஆர்வமாகி விடுவார்கள்.இரவு உணவின்போது புத்தகத்தில் உள்ள சுவாரஸ்யமான விஷயங்களை அவர்களிடம் பகிர்ந்து கொள்ளுங்கள். பிறகு அவர்களையும் பகிர்ந்து கொள்ள பழக்கப்படுத்துங்கள்.

நல்ல பழக்கங்களே நமது குழந்தைகள் யார் என்று காட்டும்.

உன்னால் முடியும் தம்பி.. தம்பி..

2011-08-20T22:45:00.000-07:00

முயற்சி செய் இளைஞனே ! தோள் கொடுக்க தேசம் காத்துக்கொண்டிருக்கிறது.

இந்த வீடியோவை கொஞ்சம் பாருங்களேன்...

வாருங்கள் நண்பர்களே ! அடுத்த காந்தி அழைக்கிறார்...

2011-08-20T07:52:00.000-07:00

நாட்டில் ஊழல்வாதிகளை தண்டிக்க வழி செய்யும் சட்ட மசோதாவான "ஜன லோக்பால் மசோதாவை' தாக்கல் செய்ய வலியுறுத்தி, கடந்த ஏப்ரல் முதல் மத்திய அரசுக்கு எதிராக போராட்டம் நடத்தி வருகிறார் சமூக சேவகர் அன்னா ஹசாரே. இவர் திடீரென ஊழலுக்கு எதிராக போராட்டத்தை துவங்கவில்லை, மாறாக 30 ஆண்டுகளுக்கு மேலாக அரசுக்கு எதிராகவும், அரசியல் வாதிகளுக்கு எதிராகவும் பல்வேறு ஊழல்களை எதிர்த்து போராட்டங்களை நடத்தி, வெற்றியும் பெற்றிருக்கிறார். இவரது ஊழல் எதிர்ப்பு பேராட்டத்துக்கு நாடு முழுவதும் நாள்தோறும் ஆதரவு பெருகி வருகிறது. மேலும் இவரது சமூக பணிகளை பாராட்டி, இந்திய அரசு இவருக்கு "பத்ம பூஷன்' மற்றும் பத்ம ஸ்ரீ விருதுகளை வழங்கி கவுரவித்தது. மகாராஷ்டிர அரசு "கிரிஷி புஷானா விருது' வழங்கியது. காந்திகிராம பல்கலை, கவுரவ டாக்டர் பட்டம் வழங்கி,
பெருமைப்படுத்தியது. கிசன் பாபுராய் ஹசாரே என்பது இவரின் முழுப்பெயர். 1937, ஜூன் 15ல் மகாராஷ்டிராவின் அகமத்நகர் மாவட்டத்தின் ரிலேகான் சித்தி என்ற கிராமத்தில் பிறந்தார். குடும்ப சூழ்நிலை காரணமாக பள்ளிப்படிப்பை பாதியிலே நிறுத்தி விட்டு "பூ' விற்கும் வேலைக்கு சென்றார். அவசர காலத்தின் போது அதிகளவில் ராணுவத்துக்கு இளைஞர்களை இந்தியா தேர்வு செய்தது. 1962ல் 25 வயதில் இந்திய ராணுவத்தில் ஹசாரே சேர்ந்தார். அங்கு டிரைவராக பணியை துவக்கினார்.

1965ல் நடந்த இந்தியா - பாகிஸ்தான் போரின் போது பஞ்சாப் மாநில எல்லையில் இவர் பணியாற்றினார். அப்போது பாகிஸ்தான் ராணுவத்தின் பீரங்கி தாக்குதலில் நண்பரை இழந்தார். இச்சம்பவத்தை அடுத்து வாழ்க்கையின் மீது வெறுப்படைந்தார். அப்போது டில்லி ரயில்வே ஸ்டேஷனில் உள்ள ஒரு புத்தக கடையில் சுவாமி விவேகானந்தரின் "தேசத்தை தட்டியெழுப்ப இளைஞர்களை ஒன்று திரட்டுங்கள்' என்ற புத்தகத்தை படித்தார். இது இவரது வாழ்வில் திருப்பு முனையாக அமைந்தது. மகாத்மா, வினோ பாவே போன்றவர்களின் வாழ்க்கை சரித்திரத்தை படித்தார். இதிலிருந்து ஏழைகளுக்கு உதவ வேண்டும் என்ற எண்ணத்தை வளர்த்துக் கொணடார். இதன் காரணமாக, 1978ல் 38வது வயதில் இந்திய ராணுவத்தில் இருந்து விருப்ப ஓய்வு பெற்றார். சொந்த கிராமத்துக்கு சென்ற ஹசாரே, கிராம மக்கள் வறுமை, சுகாதாரமின்மை போன்ற அடிப்படை வசதிகள் இன்றி கஷ்டப்படுவதை கண்டு அதற்காக அகிம்சை வழியில் போராட்டத்தில் இறங்கினார். கள்ளச்சாராயத்துக்கு எதிராக சக கிராமத்து இளைஞர்களை திரட்டி, போராட்டம் நடத்தினார். தானிய வங்கி ஒன்றை துவங்கி, வசதி படைத்தவர்களிடமிருந்து தானியத்தை பெற்று, ஏழைகளுக்கு வழங்கினார். விவசாயம், பால் உற்பத்தி, கல்வி, நீர்நிலைகளில் ரிலேகான் கிராமம் தன்னிறைவு பெற்றதற்காக மாநில அரசுக்கு எதிராக போராட்டம் நடத்தி வெற்றி கண்டார்.

நடத்திய போரட்டங்கள் ;

"கரப்ஷன்' என்ற ஆங்கில வார்த்தை லஞ்சம் வாங்குவதை மட்டும் குறிப்பிடுவதில்லை. நேர்மை தவறுதல், முறைகேடு போன்றவற்றையும் குறிக்கிறது. இதற்கு எதிராக போராட்டத்தை ஹசாரே துவங்கினார்.
* ரிலேகான் கிராமத்தில் மர வியாபாரிகளுக்கும், வன அலுவலர்களுக்கும் மோதல் ஏற்பட்டது. ஹசாரேயின் போராட்டத்தால் வன அலுவர்கள் இட மாற்றம் செய்யப்பட்டனர்.
* 1995 - 96ல் சிவசேனா - பா.ஜ., ஆட்சியின் போது ஊழலில் ஈடுபட்ட 2 அமைச்சர்களை பணி
நீக்கம் செய்ய போராடி வெற்றி கண்டார்.
* 2003ல் தேசியவாத காங்., அமைச்சர்கள் நான்கு பேர் மீது ஊழல் குற்றம் சாட்டினார். இதற்காக உண்ணா
விரதம் இருந்தார். இறுதியில் அந்த அமைச்சர்களையும் பதவி விலகச் செய்தார்.
* மகராஷ்டிரா அரசு, வலுவான தகவல் உரிமை பெறும் சட்டத்தை நிறைவேற்ற வலியுறுத்தினார்.
* வலுவான ஜன லோக்பால் மசோதாவை தாக்கல் செய்ய வலியுறுத்தில், ஏப்.,5 ல் டில்லியில் உண்ணாவிரத போராட்டத்தை துவங்கினார். மத்திய அரசு இவருடன் பேச்சுவார்த்தை நடத்தி, மசோதாவை தாக்கல் செய்ய சம்மதித்தது. இதையடுத்து, ஏப்., 9ல் உண்ணாவிரதத்தை முடித்துக் கொண்டார்.
* மத்திய அரசு பார்லிமென்ட்டில் தாக்கல் செய்ய உள்ள லோக்பால் மசோதாவில் பிரதமர், நீதிபதி உள்ளிட்டவர்களையும் சேர்க்க வேண்டும் என வலியுறுத்தி, மீண்டும் உண்ணாவிரத்தை துவங்கியுள்ளார்.

வாருங்கள்.. நாமும் ஆதரவளிப்போம்.ஊழல்வாதிகளுக்கு தக்க பாடம் புகட்டுவோம்.

செய்ய வேண்டியது : உங்களது அலைபேசியிலிருந்து 08030088502 என்ற எண்ணிற்கு தவறிய அழைப்பு (மிஸ்டு கால்) செய்து தங்களது மேலான ஆதரவை தெரியப்படுத்துங்கள்.நீங்கள் அழைத்தவுடன் உறுதி செய்யப்பட்ட செய்தி உங்களுக்கு வந்து சேரும்.

வருங்கால சமுதாயத்தை வளமாக்குவோம்..

நன்றி : தினமலர் / டிவிட்டர்

நான் சிறுதுளிதான் பெருவெள்ளமாக்குங்கள்..

கிப்ட் வாங்கித் தரும் பெற்றோர்களே கவனிக்கவும் !

2011-08-18T07:20:00.000-07:00

உங்களது வீட்டில் எத்தனை குழந்தைகள் இருந்தாலும் சரி அந்த வீட்டின் குழந்தைகள் அனைவரும் ஏதோ ஒரு நிபந்தனையுடன் தான் அவர்களின் அன்றாட வேலைகள் அனைத்தையும் செய்கிறார்கள். குழந்தைகள் தங்கள் செய்யும் அத்தனை வேலைக்கும் பதிலாக கொசுராக ஏதாவது வேண்டாத பொருளையோ அல்லது தேவையற்ற காரியங்களை செய்வதற்கோ லஞ்சமாக எதையாவது கேட்கிறார்கள்.இந்த பழக்கம் யாரால் எங்கிருந்து வருகிறது ?

குழந்தைகள் தங்களுடைய வேலை செய்வதற்கு ஏதாவது தர வேண்டும் என சொல்லும் பழக்கம் பெற்றோரிடம் இருந்துதான் வருகிறது.அவர்கள்தான் ஆரம்பத்தில் குழந்தை எதையாவது செய்ய மறுத்தால் உடனே குழந்தைக்கு பிடித்த பொருளை கொடுத்து அந்த காரியத்தை செய்யுமாறு சொல்கிறார்கள். ’நீ பல் தேய்ச்சினா நான் உனக்கு சாக்லேட் தருவேன் என ஆரம்பத்தில் பெற்றோர்கள்தான் குழந்தைகளிடம் கூறுகிறார்கள். குழந்தைகள் அதையே பழக்கமாக வைத்துக் கொள்கிறார்கள். இப்படி அவர்கள் அன்றாடம் செய்ய வேண்டிய வேலைக்கு பெற்றோர்கள் ஏதாவது கிப்டாக தருவது மிக மேசமான பழக்கம். இது நீண்ட கால தீர்வும் கிடையாது. இதன் விளைவாக குழந்தையும் எப்போதும் உங்களிடமிருந்து எதையாவது எதிர்பார்த்துக் கொண்டே இருக்கும். அதோடு உங்களையும் கிப்ட் வாங்கி தரும் ஒரு மெஷினாகதான் பார்க்கும். அவர்கள் அன்றாட வேலைகளை ஏன் செய்ய வேண்டும். அதனால் கிடைக்கும் நன்மைகள் என்ன? என்பதை குழந்தைக்கு புரியும் வகையில் சொல்ல வேண்டும். ஆரம்பத்தில் கடினமாகதான் இருக்கும். குழந்தைக்கு புரியும் வரை சொல்லிக் கொண்டே இருக்க வேண்டும்.

குழந்தைகளுக்கு எந்த சமயத்திலும் நீ இதை செய்தால் நான் உனக்கு இதை வாங்கி தருகிறேன் என வாக்கு தரக்கூடாது. அப்படி வாக்கு தந்தால் அதை வாங்கி கொடுத்தே தீர வேண்டும். ஏனெனில் வாங்கி தரவில்லை எனில் உங்களைப் பற்றி குழந்தைகள் தன்னுடைய நண்பர்களிடம் தவறாக பேசுவார்கள். பாராட்டுகள் அனைத்து வாய்மொழியாகதான் இருக்க வேண்டும். குழந்தைகள் ஏதாவது சாதித்தால், உங்களுக்கு தோன்றினால் மட்டும் குழந்தைகளுக்கு தேவைப்படுவதை வாங்கி தரலாம். அதையும் முன்கூட்டி சொல்ல கூடாது. அப்படி சொன்னால் எனக்கு தேவையானப் பொருள் கிடைக்கிறது. அதற்காக இதை நான் செய்தே தீரவேண்டும் என்ற எண்ணம்தான் வளருமே தவிர வேறு எந்தவிதமான வளர்ச்சியும் இருக்காது.

தொடர்ந்து கிப்ட் வாங்கி தருவதால் குழந்தைகளும் கிப்ட்டுகளுக்கு அடிமையாகிவிடுவார்கள். அது இல்லாமல் எதுவும் நடக்காது என்றாகிவிடும். நம்மிடம் எதிர்பார்ப்பதைப்போலவே மாற்றவர்களிடத்திலும் குழந்தைகள் எதிர்பர்ப்பார்கள். அதோடு அப்படி மற்றவர்களிடமிருந்து எதுவும் கிடைக்கவில்லை என்றால் அதுவே அவர்களை மனசோர்வு அடைய செய்யும். இந்த மனசோர்வு பல பின்விளைவுகளை ஏற்படுத்த கூடியது என்பதை பெற்றோர்கள் ஞாபகம் வைத்துக் கொள்ள வேண்டும்.

சின்ன சின்ன விஷயங்களுக்கு கூட குழந்தைகள் கிப்டை எதிர்பார்க்க ஆரம்பித்து விடுவார்கள். அந்த சமயத்தில் குழந்தையை சமாதனம் செய்ய நான் வாங்கி தருகிறேன் என்றுச் சொல்லிவிட்டு வங்கிதரமால் இருந்தால் அது தவறு. நாம் தான் குழந்தைகளின் முதல் ரோல்மாடல். நாளை குழந்தையும் நம்மைப்போலவே வாக்கு கொடுக்கும். ஆனால் செய்யாது. மேலும் வீட்டில் இரண்டு குழந்தைகள் இருந்தால் ஒரு குழந்தை திறமையாக எதாவது செய்தால் அதற்கு நீங்கள் பரிசு வாங்கி தருகிறீர்கள் என்றால் மற்றொரு குழந்தையிடம் இருக்கும் நல்ல விஷயத்தை கண்டுபிடித்து அதற்கு பரிசு வாங்கி தரவேண்டும். இந்த சமயத்தில் நீங்கள் மேலும் ஒன்றை செய்ய வேண்டும். திறமையை வெளிப்படுத்திய குழந்தையிடம் அவளுக்கு வாங்கி தரவில்லை என்றால் அவள் வருத்தப்படுவாள் என்பதை தெளிவாக சொல்லி புரியவைக்க வேண்டும்.

இன்னும் வளருவோம்.

காலை நேர டென்ஷனை களைவது எப்படி ?

2011-08-17T07:07:00.000-07:00

பொழுது விடிந்ததுமே குழந்தைகளின் முதல் வேலை படுக்கையிலிருந்து எழ அடம் பிடிப்பதுதான். அப்பா (அம்மா) ப்ளீஸ் 10 நிமிடம் என எழுந்திருக்கும் நேரத்தை நீட்டித்தபடி இருப்பது. இன்னும் சிலர் பதிலே பேசாத மவுனச் சாமியார்களாய் ஆழ்ந்த நித்திரையில் இருந்து பெற்றோர்களின் டென்ஷனை இரண்டு மடங்காக்கி விடுவார்கள்.சிலர் அப்படியே எழுந்து விட்டாலும் படுக்கையில் உட்காந்தே தூங்குவது, இன்னுமா எழுந்திருக்கல என்ற சத்தம் வந்ததும் நடந்து கொண்டே தூங்குவது, என் பொறுமையை சோதிக்காதே என்று அறிவிப்பு வரும் வரை தூங்கிக் கொண்டே இருப்பார்கள்.இந்த காலைநேர டென்ஷன் களைவதற்கு என்ன வழி ?.

காலை நேரம் டென்ஷனானதுதான். ஆனால் அதற்காக புலம்பாதீர்கள்.இந்த டென்ஷன் யாரால் வருகிறது? 8 மணிக்கு பள்ளி வேன் வருவதற்குள் குழந்தைகளை கிளப்பிவிட வேண்டும். இல்லாவிட்டால் பள்ளிக்கு மட்டம் போட்டு விடுவார்கள் என்று நாம் அதிகம் பதட்டமடைவதால்தான். இதன் விளைவு புலம்ப ஆரம்பித்து விடுகிறோம்.இதற்கு மாற்றாக குழந்தைகளிடம் காலையில் அவர்களை பள்ளிக்கு தயார் செய்யும் நேரம்தான் உங்களுக்கு மகிழ்ச்சியான நேரம் என்பதை தெரியப்படுத்துங்கள்.

குழந்தைகள் காலையில் சீக்கிரம் எழுந்தாலே எல்லா வேலைகளும் சீக்கிரம் முடிந்து விடும். குழந்தைகள் இரவில் சீக்கிரம் படுக்காமல் காலையில் நேரத்திற்கு எழமுடியாது. சிலசமயம் அதிக இரவு உணவினாலும் எழ முடியாமல் போகிறது. நண்றாக சாப்பிடுவது என்பது அதிகமாய் சாப்பிடுவது என்று தவறாகப் புரிந்து கொண்டு பெற்றோர்கள் வற்புறுத்தி அதிக உணவை தந்து சாப்பிட வைப்பதாலும் தாமதமாய் நேரம் தவறி சாப்பிடுவதாலும் செரிமானம் முழுமையாக நடைபெறாமல் எழமுடியாத அளவு அசதியை ஏற்படுத்தி விடுகிறது.எனவே இரவு உணவு விசயத்தில் கவனம் இருக்கட்டும்.

அடுத்து குழந்தைகளின் தூங்கும் நேரத்தை முறைப்படுத்துங்கள் இரவு 9-9.30 மணிக்குள் உறங்குவதற்கு பழக்கப் படுத்துங்கள். எதற்காக விரைவாக தூங்க வேண்டுமென்றால், இரவில் 9 மணி முதல் காலை 6 மணி வரை உள்ள நேரத்தில் நம் உடலில் பல வேதியல் மாற்றங்கள நிகழ்கிறது. உடலில் வளர்ச்சி ஏற்படுவதற்கு உதவியாக நாம் தூங்கும் நேரம் மாறுவதால் வேதியல் மாற்றங்கள் முழுமையாக நிகழாமல் உடல் வளர்ச்சியில் பாதிப்பு ஏற்படுகிறது

பெரும்பாலான வீடுகளில் குழந்தைகள் காலை வேளையில் பிரஷ்ஷை வாயில் வைத்து விட்டு யோசிக்க ஆரம்பித்தால் அதில் ஆழ்ந்து போய் பிரஷ்ஷை அசைக்கவே மறந்து சிலையாகி விடுவார்கள். காரணம் கற்பனையில் மிதப்பது. செய்கிற வேலையில் கவனமில்லாமல் அடுத்து செய்ய வேண்டிய வேலையைப் பற்றி யோசித்துக் கொண்டிருப்பது.கற்பனையை கலைக்க அவ்வப்போது தம்பி. என்ன செய்யறீங்க? என்ற நினைவூட்டல் மூலம் செய்யும் செயலில் கவனத்திற்கு அவர்களை கொண்டு வரலாம்.

காலையில் கிளம்புவது அவர்கள் வேலை. அதற்கு உற்சாகம் அளிப்பது மட்டுமே நம் வேலை என்று இருக்க வேண்டும். மிகவும் மெதுவாக சாப்பிடுகிறார்கள். என்றால் அவர்களை சரியான நேரத்திற்கு சாப்பிட உற்சாகப்படுத்தினால் போதும். மாறாக நீங்களே ஊட்ட ஆரம்பித்தால் அவர்களுக்கு நாமாக கிளம்ப வேண்டியதில்லை. நாம் எவ்வளவு மெதுவாகச் செய்தாலும் அம்மா கிளப்பிவிடுவார்கள் என்றாகி விடும்.காலை வேளையில் மட்டும் பிடித்தமான உணவு வகைகள் கொடுப்பதன் மூலம் அதிக நேரம் எடுப்பதை தவிர்க்கலாம்.

காலையில் குறுகிய நேரத்தில் அதிக வேலைகள் இருப்பதால் அடுத்த நாள் வேலைகளை இரண்டாகப் பிரித்து முதல் நாளே செய்து வைத்து விடக்கூடிய வேலைகளை முடித்து விடுவீர்கள்தானே. அதே போல ஹோம் – ஒர்க் செய்யாமல் படுக்கக்கூடாது என்பதையும் எடுத்து கூறுங்கள். இதனால் ஸ்கூல் கிளம்பும் போது ஹோம்-ஒர்க் எழுதிக் கொண்டு இருந்து சாப்பிடாமல் உங்களை டென்ஷன் படுத்தமாட்டார்கள்.

மாலையில் செய்ய வேண்டிய வேலைகளின் பட்டியலை அவர்களை விட்டே எழுத வையுங்கள். அதை அவர்களின் அறையில் ஒட்டச் செய்யுங்கள்.இதோ சில யோசனைகள்...
1. பள்ளியிலிருந்து வந்ததும் முகம் கை கழுவுதல்
2. அரை மணி நேரம் விளையாட்டு
3. ஹோம் ஒர்க் செய்து முடித்தல்
4. கையெழுத்து வாங்குதல்
5. யூனிபார்ம் எடுத்து வைத்தல்
6. மறுநாள் பள்ளிக்குத்தேவையானதை டைம் டேபிள் படி எடுத்து வை என எழுதி
அவர்கள் கண்ணில் படும் இடத்தில் ஒட்டி வையுங்கள்.நாள் வளர வளர அவர்களாகவே வேலைகளை மிகுந்த ஈடுபாட்டோடு செய்ய ஆரம்பித்து விடுவார்கள்.பெற்றோருக்கும் சிறிது டென்ஷன் குறையும்.

குழந்தை வளர்ப்பு : கேள்வி கேட்கும் குழந்தைகள்

2011-08-16T06:28:00.000-07:00

குழந்தைகள் கேள்வி கேட்பது எவ்வளவு நல்ல விஷயம்! அம்மா (பா) ஏன் வானம் நீலமா இருக்கு? ஸ்விட்ச் போட்டதும் லைட் எப்படி எரியுது? ஏ.டி.எம்மில் எப்ப்டி பணம் வருகிறது? டி.வி எப்படி வேலை செய்கிறது ?... இப்படியெல்லாம் அடுக்கடுக்காய் கேள்விகள் கேட்டால் எந்த பெற்றோருக்கும் சந்தோஷமாகத்தான் இருக்கும்.மேலும் குழந்தைகளிடம் இருந்து வரும் பெரும்பாலான கேள்விகள் அம்மா நீ ஏன் வேலைக்கு போக மாட்டேங்கற?, அப்பா, நீ ஏன் கறுப்பா இருக்க?, ஏன் அந்த அண்ணாவும், அக்காவும் கல்யாணம் பண்ணிக்கிறாங்க?...இது போன்று குழந்தைப் பருவத்தில் மட்டுமல்லை. எல்லாப் பருவத்திலும் அவர்கள் கேள்வி கேட்டுக்கொண்டேதான் இருக்கிறார்கள். மாற்றங்களை அவர்கள் பார்க்கும்போது இந்த மாதிரியான கேள்விகள் வருகின்றன. கேள்வி எழும் பருவத்தைப் பொறுத்து, அதற்கான பதிலை யாரிடம் கேட்க வேண்டும் என்று அவர்கள் முடிவு செய்து கொள்வார்கள். குழந்தைப் பருவத்தில் அவர்களுக்குத் தெரிந்த ஒரே தீர்வு பெற்றோர்கள்தான்.

மூன்று வயதுவரை குழந்தைகள் வெளி உலகத்தை அதிகம் பார்த்திருக்க மாட்டார்கள். எங்கே போனாலும் அம்மா, அப்பா அல்லது மாமா, அத்தை ஆகியோருடன்தான் போவார்கள். உலகத்தை இவர்களது கண்களின் மூலம்தான் பார்ப்பார்கள். ஆனால் பள்ளியில் பல விதமான மாணவர்கள், டீச்சர்கள், என எல்லாமே வித்தியாசமாக இருக்கும். வித்தியாசத்தைப் பார்க்கும்போது அது ஏன் என்று கேள்வி கேட்கும் ஆர்வம் இயல்பிலேயே அனைவருக்கும் இருக்கும். அதுதான் குழந்தைகளுக்கும் இருக்கிறது.

குழந்தைகள் எவ்வளவு ஏடாகூடமாகக் கேள்வி கேட்டாலும் பதில்சொல்வதைத் தவிர்க்கக் கூடாது. அவர்களுக்குப் புரியும் விதத்தில் ஏதாவது பதிலைச் சொல்ல வேண்டும்.நீங்கள் பதில் சொல்ல வில்லை என்றாலும், அந்தக் கேள்விகளுக்கான பதிலைக் குழந்தைகளே தெரிந்துகொள்வார்கள்.இன்றைய சமுதாயமும்,டிவியும், சினிமாவும் கற்றுத் தந்துவிடும். அதன் விளைவுகள் நன்றாக இருக்காது.

பெற்றோர்களும் நிறைய விஷயங்களைத் தெரிந்து வைத்துக்கொள்ள வேண்டும். குழந்தைகள் கேட்கும் கேள்விக்கு அறிவியல் பூர்வமாக பதில் சொல்ல வேண்டும். அப்போதுதான் அவர்கள் அந்த பதிலை வைத்து மற்ற விஷயங்களை அணுகுவர்கள். அவர்களுடன் செலவிடும் நேரம் வெட்டித்தனமாக இல்லாமல் உணர்வுபூர்வமாகவும் அறிவுபூர்வமாகவும் பயனுள்ள வகையில் இருக்க வேண்டும். அவர்கள் கேட்கும் கேள்விகளுக்கு அவர்களுக்குப் புரியும் வகையில் பதில் சொல்ல வேண்டும்.அதேபோல் மற்ற குழந்தைகளுடன் ஒப்பிட்டு பார்க்கவே கூடாது. அப்புறம் அவர்கள் உங்களிடம் கேள்வி கேட்பதைக் குறைத்துக்கொள்வார்கள். ஏடாகூடமான கேள்விகளை வேறு யாரிடமாவது போய்க் கேட்டால் என்ன ஆகும் என்று யோசித்துப் பாருங்கள்.

குழந்தைகள் பல விஷயங்களை வீட்டிலிருந்துதான் கற்றுக்கொள்கிறார்கள். பேச்சு, நல்ல பழக்கவழக்கங்கள், நல்லது எது? கெட்டது எது ? என பல விஷயங்களுக்கும் அஸ்திவாரம் போடுவது வீடு என்னும் கோயில்தான். பெற்றோற்கள் குழந்தைகளின் எதிரில் ரொம்பவும் ஜாக்கிரதையாகப் பேசவேண்டும். கறுப்பு, சிவப்பு, ஜாதி, மதம் ஆகியவற்றைப் பற்றியெல்லாம் அவர்கள் முன்னிலையில் பேசுவதை தவிர்க்க வேண்டும். கோபம் வரும்போதுகூட வார்த்தைகளைப் பார்த்துதான் பயன்படுத்த வேண்டும்.

கேள்விகள் கேட்கும் குழந்தைகள் மட்டும்தான் அடுத்த கட்டத்திற்கு விரைவாகச் செல்லும். ஏன் குழந்தைகள் இப்படிக் கேள்வி கேட்கிறார்கள் என்று புலம்பக் கூடாது. பதில் சொல்ல வேண்டும். அப்போதுதான் அடுத்த தலைமுறை குழந்தை வளமாக வளரும்.

இன்னும் வளருவோம்.

குழந்தைகள் படிப்பதற்காக பெற்றோர்கள் செய்ய வேண்டியவை…

2011-08-12T06:43:00.000-07:00

தங்களின் பிள்ளைகள் படிப்பில் சிறந்து விளங்க வேண்டும் என்று அனைத்து பெற்றோர்களும் ஆசைப்படுகிறார்கள். ஆனால் பலரும் அதன்பொருட்டு தங்களின் குழைந்தைகளுக்கு உதவி செய்வதில்லை. சிலர் செய்ய நினைத்தாலும் வழிமுறை தெரிவதில்லை. அவர்களுக்காக இதோ சில யோசனைகள்...

வீட்டில் டி.வி. பயன்பாடு என்பது முக்கியமானதுதான். அதேநேரத்தில், படிக்கும் நேரம் என்று வந்துவிட்ட பிறகு அதை அணைத்துவிட வேண்டும். என்னதான் பிடித்த நிகழ்ச்சி என்றாலும் அதற்கு இடம் கொடுக்கக் கூடாது. குழந்தைகளின் எதிர்காலம்தான் முக்கியம்.

படிக்கும் நேரத்தில் வீட்டு தொலைபேசியை பயன்படுத்தும் அளவு குறித்து ஒவ்வொரு பெற்றோரும் முடிவு செய்ய வேண்டும். படிக்கும் நேரத்தில் நீண்ட நேரம் பேசுவதை தவிர்க்கலாம். அதேசமயம், ஏதேனும் முக்கிய பாட விஷயங்களைப் பற்றியோ, வீட்டுப்பாடம் பற்றியோ, சக வகுப்பு தோழர்களுடன் தொலைபேசியில், தங்களின் பிள்ளைகள் பேச வேண்டியிருந்தால், அதை பெற்றோர் அனுமதிக்க வேண்டும்.

வீட்டில் போதுமான வசதி இருந்தால், உங்களின் குழந்தை படிப்பதற்கு ஒரு அறையை ஒதுக்கி தரவும். அந்த அறை அழகாக இருக்கிறதா என்பதை காட்டிலும், போதுமான வசதியுடன் இருக்கிறாதா? என்பதுதான் முக்கியம். மேலும், பாடகுறிப்புகளை முறையாக எழுதி வைத்துக்கொள்ள உங்கள் பிள்ளைகளை ஊக்குவிக்க வேண்டும். அப்போதுதான் எந்த குழப்பமும் வராது. உங்கள் குழந்தைகளுக்கு தேவையான அத்தியாவசிய பொருட்களான பேனா, பென்சில், ரப்பர் உள்ளிட்ட பல பொருட்கள் இருக்கிறதா என்பதை உறுதிசெய்ய வேண்டும்.

இரவு நேரத்தில், குடும்ப கலந்துரையாடல் மற்றும் இரவு உணவு முடிந்தவுடன் குழந்தைகள் படிக்க ஆரம்பிப்பது மற்றும் வீட்டுப்பாடம் செய்ய தொடங்குவதை பெற்றோர் உறுதிசெய்ய வேண்டும். சில நாட்களில், பிள்ளைகள் பள்ளியிலிருந்து விரைவிலேயே வீடு வந்துவிட்டால், உணவுக்கு முன்பே வீட்டுப் பாடத்தை முடிக்க உதவலாம்.

உங்களின் குழந்தைகள் ஒரு குறிப்பிட்ட வீட்டுப் பாடத்தை முடிக்க அல்லது ஒரு பாடத்தை படிக்க எவ்வளவு நேரம் எடுத்துக் கொள்கிறார்கள் என்று கவனியுங்கள். அதற்கேற்ப அவர்களுக்கு, ஒவ்வொரு வேலையை முடித்த பிறகும், சிறிதுநேரம் இடைவெளி விடலாம். இடைவெளியை கண்காணித்து, சரியான நேரத்தில் அவர்கள் மீண்டும் படிப்பில் அமர்வதை பெற்றோர் உறுதிசெய்ய வேண்டும்.

தேர்வு சமயத்தில் பிள்ளைகளின் மீது பெற்றோர் கூடுதல் கவனம் செலுத்த வேண்டும். சில மாணவர்களுக்கு தேர்வு பயம் மிக அதிகமாக இருக்கும். மேலும், தேர்வுக்கு முதல் நாள் இரவு நெடுநேரம் கண்விழித்து சிலர் படிப்பார்கள். ஆனால் உங்கள் பிள்ளைகள் அதை செய்வதை தவிர்த்து விடுதல் நலம். இரவு தூக்கம் மிகவும் முக்கியம். அப்போதுதான் மறுநாள் தேர்வை சிறப்பாக கவனித்து எழுத முடியும்

கேள்வித் தாளை நன்கு தெளிவாக படித்து பதில் அளிக்குமாறும், தெரியாத கேள்விகளை முதலில் தவிர்த்துவிட்டு, தெரிந்த கேள்விகளுக்கு விடை எழுதி, மீதி நேரம் இருந்தால் மீண்டும் அந்த விடுபட்ட கேள்விகளுக்கு வருமாறும், விடைத்தாளில் சரியான எண்களை கவனமாக எழுதுமாறும் அறிவுறுத்த வேண்டும்

உங்களின் குழந்தை எந்த பாடத்தில் பலவீனமாக இருக்கிறது என்பதை கவனித்து, அதைப்பற்றி உங்கள் குழந்தை என்ன சொல்கிறது என்பதை பரிவுடன் கேட்க வேண்டும். அந்த பாடத்தை முடிந்தால் நீங்களே நேரம் ஒதுக்கி சொல்லித்தரலாம் அல்லது டியூஷனுக்கு ஏற்பாடு செய்வதைப் பற்றி யோசிக்கலாம். இல்லையெனில், சம்பந்தப்பட்ட ஆசிரியருடன் இதுகுறித்து பேசலாம்.

எந்த குழந்தையையும் அடிப்பதை தவிர்க்க வேண்டும் என்றாலும், சாதுவான மற்றும் நார்மலான நிலையில் இருக்கும் குழந்தைகளை எக்காரணம் கொண்டும் படிப்பு விஷயத்தில் அடிப்பதை தவிர்க்க வேண்டும். சரியான முறையில் தீர்வு காண பெற்றோர் முயல வேண்டும்.

பெற்றோர்களே இதை நாம் செய்தால்தான் நம் குழந்தைகள் படிப்பில் சிறந்தவர்களாக வருவார்கள்.

இன்ன்னும் வளருவோம்..

பிரச்சினைகளை எதிர்கொண்டு வெற்றி பெற...

2011-08-10T06:50:00.000-07:00

பெற்றோர்களின் வாழ்வில் பிரச்சினை என்பது தவிர்க்க முடியாத ஒன்று. ஒவ்வொருவரும் வாழ்க்கையில் பலவிதமான பிரச்சினைகளை சந்திக்கின்றனர். சுருக்கமாகச் சொன்னால் பிரச்சினை இல்லாத மனிதனே இல்லை. மனைவி அல்லது குழந்தையோடு பிரச்சினை, கல்வியறிவில்லை, உடல்நலம் இல்லை, குண்டாக இருக்கிறேன், கல்யாணம் ஆகவில்லை, சொந்த வீடு இல்லை, பணமில்லை, கார் இல்லை, அலுவலக பிரச்சினை என பிரச்சனைகளின் பட்டியல் நீண்டுகொண்டே போகிறது. இந்த மாதிரியான பிரச்சினைகளை எல்லாம் எதிர்கொண்டு வெற்றி பெற சில யோசனைகள்.

ஒவ்வொரு பிரச்சினைக்கும் ஒரு முடிவு உண்டு. பிரச்சினைகள் எப்போதும் நிரந்தரமாக இருக்கப் போவது இல்லை என்பதை நீங்கள் முதலில் உணர வேண்டும்.

உலகத்தில் உள்ள மக்கள் எல்லோருக்கும் ஏதாவது ஒரு பிரச்சினை இருக்கிறது. நான் மட்டும் தான் எல்லாவித பிரச்சினைகளையும் எதிர்கொள்கிறேன் என்று எண்ணாதீர்கள். பில்கேட்ஸ் முதல் பிச்சைக்காரர்கள் வரைக்கும் பிரச்சினை என்பது எல்லோரிடமும் தான் இருக்கிறது.

நீங்கள் சந்திக்கும் பிரச்சினை ஒன்றும் புதிதாக இருக்கப் போவதில்லை. உங்களைப் போன்ற ஒருவர் தான், இதே போன்ற பிரச்சினையை சமாளித்து ஜெயித்திருக்கிறார். அதனால் தன்னம்பிக்கையோடு செயல்பட்டு பிரச்சினையை முறியடியுங்கள்.

ஒவ்வொரு பிரச்சினையும் உங்களுக்கு புதிய வழிகளையும், புதிய பாடத்தையும் கற்றுக் கொடுக்கிறது என்பதை புரிந்து கொள்ளுங்கள்.

பிரச்சினைகளை சமாளித்து வெற்றி பெறும் போது, உங்களுக்கு ஆதாயம் தான் கிடைக்கிறது என்பதை உணர்ந்து செயல்படுங்கள்.

பிரச்சினைகளை சமாளிப்பதற்கு ஆயிரம் வழிகள் இருக்கின்றன. அதை மட்டும் தான் நீங்கள் எண்ணிப் பார்க்க வேண்டும். எதிர்மறையாக சிந்திக்காதீர்கள்.

இறுதியாக, பிரச்சினை என்கிற வார்த்தையே நாம் பார்க்கும்கோணத்தில் தான் இருக்கிறது. அதனால், பிரச்சினைகளை எவ்வித பதட்டமில்லாமல்அமைதியான மன நிலையில் அணுகி வெற்றி பெறுங்கள்.

இன்னும் வளரும்

அதிர்ச்சி தகவல் : குழந்தை டிவி பார்த்துகொண்டே உள்ளதா ?

2011-08-08T11:08:00.000-07:00

சமீபகாலமாக டி.வி.சேனல்களின் எண்ணிக்கை அதிகரித்துக் கொண்டேதான் இருக்கிறது. அதே சமயம் பெரியவர்கள் மட்டுமல்ல குழந்தைகளும் டி.வி.மோகத்தின் பிடியில் சிக்கி இருக்கிறார்கள். பல மணி நேரம் தொடர்ந்து டி.வி.பார்ப்பதால் உடல்நலம் கடுமையாக பாதிக்கப்படும் என்கிறது சமீபத்தைய கணக்கெடுப்பு ஒன்று.

நாடு முழுவதும் எடுக்கப்பட்ட இந்த ஆய்வின் மூலம் பல்வேறு அதிர்ச்சி தகவல்கள் தெரியவந்துள்ளன.

300 குழந்தைகளிடம் எடுக்கப்பட்ட இந்த ஆய்வில் 20 சதவீதம் பேர் தற்போது தொப்பையுடன் உள்ளனர்.

இதுதவிர 10 சதவீத குழந்தைகளுக்கு தலைவலியும், 2 சதவீத குழந்தைகளுக்கு வலிப்பும் உள்ளது.

6 சதவீத குழந்தைகளுக்கு உடல் பலவீன நோய்களும் பாதித்திருப்பது தெரியவந்தது.

அதிக அளவில் டி.வி.பார்ப்பதால் 53 சதவீதத்திற்கும் மேற்பட்ட குழந்தைகள் மிகவும் தாமதமாகவே தூங்கச் செல்கின்றனர்.

இதனால் அவர்கள் போதுமான ஓய்வு எடுக்க முடியாத நிலை ஏற்படுகிறது.

டி.வி.பார்ப்பதால் குழந்தைகளின் பழக்க வழக்கங்களில் மாற்றம் ஏற்படுவதாகவும், அவர்கள் அதிக அளவில் கோபம், எரிச்சல், அடைவதாகவும், 32 சதவீத குழந்தைகளின் பெற்றோர் தெரிவித்துள்ளனர்.

டி.வி.பார்க்கும் குழந்தைகள் வெளியில் சென்று விளையாடுவதில்லை. இதனால் உடல் மற்றும் மன நலத்திற்கு தேவையான அத்தியாவசிய பயிற்சிகள் அவர்களுக்கு கிடைக்காமல் போய் விடுகிறது.

அதிக அளவில் டி.வி.பார்க்கும் குழந்தைகளில் 70 சதவீதம் பேருக்கு பேசும் மொழிகளில் தெளிவு இல்லாத நிலை உள்ளது. தாங்கள் சொல்ல நினைப்பதை தெளிவாகச் சொல்ல முடியாமல் திணறுகின்றனர்.

ஆகவே , பெற்றோர்களே, இந்த ஆய்வு முடிவை பார்த்தாவது நீங்கள் குழந்தை வளர்ப்பில் கவனம் செலுத்துங்கள்.அவர்களின் டிவி பார்க்கும் நேரத்தை கண்காணியுங்கள்.

டிவியே பார்க்க வேண்டாம் என்று சொல்லவரவில்லை. அவர்களின் அறிவு வளர்ச்சிக்கும், மன நலத்திற்கும் நன்மைகளை அள்ளித் தருகிற புத்தகங்களை படிக்க பழக்குங்கள். தினமும் செய்தித்தாள்களை வாங்கி படிக்கச் செய்யுங்கள்! இதன் மூலம் அவர்களது பொது அறிவு வளர்வதுடன் நல்ல சிந்தனையாளர்களாவும், பேச்சாளர்களாகவும் மாற வாய்ப்பிருக்கிறது. குழந்தைகள் மேதைகளாவது உங்கள் கைகளில்தான் உள்ளது.

இன்னும் வரும்.

நன்றி : இணையம்

பொய் கூறும் குழந்தையை என்ன செய்வது..

2011-08-08T07:10:00.000-07:00

குழந்தை ஏன் பொய் சொல்கிறது? பெரும்பாலும் பெற்றோர் மீது உள்ள பயத்தினால்தான். நீங்கள் திட்டுவீர்கள், அடிப்பீர்கள் என்று நினைத்துதான் பொய் சொல்கிறார்கள். குழந்தைகளிடம் உங்கள் அணுகுமுறையை மாற்றிப் பாருங்கள். குழந்தைகள் மீதுள்ள குற்றப் பார்வைதான் அவர்களைப் பொய் சொல்லத் துண்டுகிறது. பொய் சொல்வதுதான் பிற்காலத்தில் மிகப் பெரிய விளைவுகளை ஏற்படுத்தும். ஒவ்வொரு பருவத்திலும் குழந்தைகள் பொய் சொல்லத்தான் செய்கின்றன. அதற்கு தண்டனை தராமல் அந்தப் பிரச்னைக்குத் தீர்வு தர முயற்சித்துப் பாருங்கள்.

ஒவ்வொரு குழந்தைக்கும் பெற்றோர்கள்தான் ரோல் மாடல். தன் அப்பா, அம்மா செய்வதை அப்படியே செய்து பார்க்க நினைப்பார்கள் அப்படித்தான் பொய் சொல்வதையும் செய்கிறார்கள். குழந்தைகள் பொய் சொல்வதை நீங்கள் அறிந்துகொண்டால் அதை அப்படியே விட்டுவிடுங்கள். அந்த நேரத்தில், இனிமேல் நீ பொய் சொல்லுவியா? என்று மிரட்டினாலோ, அடித்தாலோ... அடுத்த முறையும் அவர்கள் பொய்தான் சொல்லுவார்கள்.

குழந்தைகளின் ஆசைகளை நிறைவேற்றுகிறேன் என நினைத்து ஒருவருக்கொருவர் தெரியாமல் அவர்களுக்கு பிடித்த பொருட்களை வாங்கித் தருவது மிகவும் தவறான செயல். நீங்கள் குழந்தையின் மீது உள்ள அன்பினால்தான் இதைச் செய்கிறீர்கள். ஆனால் அதன் விளைவுகள் மிக மோசமாக இருக்கும். குழந்தையின் பிறந்த நாளுக்கு 2000 ரூபாய்க்கு புது சைக்கிள் வாங்க நினைத்து கடைக்குப் போகிறீர்கள். ஆனால் கடையில் 3000 ரூபாய் சைக்கிள் அழகாக இருக்கிறது. அதை வாங்குகிறீர்கள். ஆனால் குழந்தையிடம், அப்பா(மா) கேட்டால் 2000 ரூபாய்னு சொல்லு பாப்பா என்று சொல்வோம். நீங்கள் சொல்வதைதான் குழந்தை நம்மிடம் அடுத்தமுறையும் செய்ய பார்க்கிறது. குழந்தை செய்தவுடன் நமக்கு கோபம் வருகிறது.

குழந்தை எதையாவது கேட்கிறதா... ஒன்று அதை வாங்கிக் கொடுங்கள். அல்லது இல்லை என்று அதற்கான காரணத்தைச் சொல்லுங்கள். குழந்தைகள் இரண்டு அல்லது மூன்றாம் வகுப்பு போகும்போது ஸ்கூலுக்கு போக காசு வேண்டும் என அடம்பிடிப்பார்கள். நீங்கள் கொடுக்கவில்லை என்றால் குழந்தை அப்பாவின் சட்டைப் பையிலிருந்து காசு எடுக்கும். ஏன் காசு கேட்கிறது என யோசிக்க வேண்டும். பிரச்னை தீர ஸ்கூலில் மற்ற குழந்தைகள் காசு கொண்டுவருகிறார்களா என்பதை விசாரித்து அந்தக் குழந்தைகளின் பெற்றோர்களிடம் பேசுங்கள்.

அடுத்தது குழந்தைகள் அதிகம் வெளியே போக ஆசைப்படுவார்கள். அதற்குத் தடை விதிக்க வேண்டாம். நல்ல நண்பர்கள் வீட்டுக்குத் தேவை இருந்தால் மட்டுமே போக வேண்டும் என கட்டளை விதிக்க வேண்டாம்.. மறுத்தால் நான் கிளாஸ் ஒர்க் நோட் கேட்கப் போகிறேன் என்று பொய் சொல்லுவார்கள். அதைப் போல இந்த வயதில் போனில் பேச வேண்டும் என ஆசையும் இருக்கும். குழந்தைகளை விட்டுதான் பிடிக்க வேண்டும்.

தவறு செய்வது இயல்புதான். அது அடுத்த முறை தொடராமல் தடுக்க வேண்டும் இதுதான் பெற்றோரின் கடமையும் கற்றுக்கொள்ள வேண்டிய கலையும் கூட.

நல்ல பெற்றோர்களாக இருப்போம். நல்லபடியாக குழந்தைகளை வளர்ப்போம்.

இன்னும் கலைகள் வளரும்.

இன்றைய வள்ளுவரின் வாக்கு..

பொய்மையும் வாய்மை யிடத்து புரைதீர்ந்த

நன்மை பயக்கு மெனின்.

இன்றைய அரும்புகள் நாளையசமுதாயத்தின் நறுமலர்களாக....

2011-08-07T10:48:00.000-07:00

கல்வி என்பது குழந்தைகளின் அடிப்படை உரிமை. இருப்பினும், குழந்தைகள் தங்கள் அடிப்படை உரிமையை இழந்து தொழிலாளர்களாகவும், கொத்தடிமைகளாகவும் இருந்து மீட்கப்படும் தகவல்கள் அவ்வப்போது வெளிவருவது கவலை அளிப்பதாக உள்ளது. குழந்தைத் தொழிலாளர் முறையை முற்றிலுமாக ஒழிக்க மத்திய, மாநில அரசுகள் எடுத்துவரும் ஆக்கபூர்வமான நடவடிக்கைகள் வரவேற்கத்தக்கவை. ஆபத்தான தொழில்களில் குழந்தைத் தொழிலாளர்களை அறவே ஒழிக்க வேண்டும்

வறுமையும், கல்வியறிவின்மையுமே குழந்தைத் தொழிலாளர் பிரச்சினைக்கு முக்கிய காரணம் என்று ஆய்வுகளிலிருந்து தெரியவருகிறது. இந் நிலையில் வறுமை தொடரும்வரை குழந்தைத் தொழிலாளர் முறையை முற்றிலும் ஒழிப்பது சிரமமே என்று மத்திய அரசு அமைத்த குழு தனது ஆய்வு அறிக்கையில் தெரிவித்துள்ளது. எனவே, வறுமை, கல்வியின்மையைப் போக்கும் திட்டங்களில் முனைப்பு காட்ட வேண்டும். அப்போதுதான், இன்றைய அரும்புகள் நாளைய சமுதாயத்தின் சிறந்த மலர்களாக மணம் வீச முடியும்.

குழந்தைத் தொழிலாளர் முறை என்பது வெட்கப்பட வேண்டிய மற்றும் உடனடியாக ஒழிக்கப்படவேண்டிய ஒன்று. பள்ளிக்கூடம் செல்ல வேண்டிய சிறுவர் சிறுமியர்கள் கடைகள், விடுதிகள், ஓட்டல்கள், பட்டாசு மற்றும் தீப்பெட்டி, கல்லுப்பட்டறை இன்ன பிற இடங்களில் பரவலாக வேலை செய்கின்றனர். அவர்களுடைய தொழில் என்பது அவர்களுக்கு இழைக்கப்பட்ட அநீதி. அவர்களது சம்பளம் என்பது பெற்றோருக்கு அவமானம். இச்சிரார்களை மீட்பதற்காக அரசாங்கம் மிகவும் மெனக்கெட்டு வழிவகைகளை ஏற்படுத்துகிறது. இத்தகு சிறுவர்களின் நிலையில் என்னால் மாற்றம் ஏற்படுத்த முடியும் என்று நான் நினைக்கவில்லை.நான் சிறு துளிதான் வாருங்கள் விழிப்புணர்வை ஏற்படுத்துவோம்.

இன்னும் கலைகள் வளரும்…

வெற்றியாளர்களின் எனர்ஜி டானிக்….

2011-08-06T08:48:00.000-07:00

ஈன்ற பொழுதில் பெரிதுவக்கும் தன்மகனை

சான்றோன் எனக்கேட்ட தாய்.

தாமஸ் ஆல்வா எடிசன் பள்ளியில் இருந்து படிக்க லாயக்கில்லை என்று விரட்டப்பட்டார். அந்த குழந்தையின் தாய் என் மகனின் திறமைகளை இந்த உலகம் இன்று புரிந்து கொள்ளவில்லை. ஆனால் பின்பு புரிந்து கொள்ளும் என நம்பினார். தானே குழந்தைக்கு அத்தனை பாடங்களையும் சொல்லிக் கொடுத்து அவன் செய்யும் பரிசோதனைகளுக்கு உதவினார். மிகச் சிறந்த விஞ்ஞானியாக உருவாக்கினார். அந்த தாய்க்கு இன்று இந்த உலகே கடமைப்பட்டிருக்கிறது.

முட்டாள்தனமாக கேள்வி கேட்டு கொண்டிருக்கிறான். அவன் கேட்கும் கேள்விகளுக்கெல்லாம் பதில் சொல்ல முடியாது என்று பள்ளி ஆசிரியர் ஐன்ஸ்டினை வெறுத்தார். உற்றார் உறவினர்களும் அவரை ஒதுக்கினர்.ஆனால், அவரது தாயும் ஜேக்கப் என்ற அவரது மாமாவும் அவரை மதித்து அவரது கேள்விக்கு விடை காண உதவினர். அவருக்கு ஊக்கம் கொடுத்தனர். அவர்களின் ஊக்கத்தால் அந்த மாமேதை உருவானார்.

நீண்ட நாள் இறைவனை வேண்டி அதன் பலனாக தான் பெற்ற ஒரே தவப்புதல்வனை தன் கைகளில் வைத்துக் கொஞ்சாமல் இறைவனின் ஆலயத்தில் ஒப்படைத்தார் இறைவன் தொண்டுக்காக. அன்னாள் என்ற அந்த தாய் பெற்றெடுத்த அந்த புதல்வன்தான் சாமுவேல் என்ற மாபெரும் தீர்க்கதரிசி என்று பைபிள் கூறுகிறது.இன்று நாம் அறிந்த சாய்னா நேவலின் வெற்றிக்குப்பின்னால் அவரது பெற்றோரின் கடின உழைப்பு, பெரும் முயற்சி காரணமாக இருக்கிறது.

ஒரு தாய்க்கும் தந்தைக்கும் குழந்தை பற்றிய சுயமதிப்பு எத்தனை உயர்வாக இருக்கிறதோ அந்த அளவுக்கு அந்த குழந்தை தன் வாழ்வில் சாதிக்கிறான்.

இன்னும் கலைகள் வளறும்...

குழந்தைகளின் பாதுகாப்பை உறுதி செய்யுங்கள்...

2011-08-05T09:14:00.000-07:00

குழந்தைகளை வளர்க்கும் பெற்றோர்களே.. அவர்களின் நிகழ்காலத்திற்கான பாதுகாப்பை இன்றெ உறுதி செய்யுங்கள்.தாங்கள் பணயப்பொருளாய், போகப் பொருளாய் பார்க்கப்படுகிறோம் என்பதுகூட புரியாத வயதில் அயோக்கியர்களையும் அங்க்கிள் என்றே அழைக்கும் பிஞ்சுகளை அவர்களின் குழந்தைத்தன்மை மாறாமல் பாதுகாக்கப் போகிறோமா அல்லது யாரையும் நம்ப முடியாத சூழலை உணர்த்தப் போகிறோமோ?

குழந்தைகளின் எதிர்காலத்திற்கான காப்பீடுகள், பாதுகாப்பு என்று எண்ணிலடங்காத திட்டங்கள் பெற்றோர் மனங்களில் எழுவதுண்டு. ஆனால் குழந்தைகளின் நிகழ்காலத்திற்கான பாதுகாப்பை உறுதி செய்யும் உணர்வு ஒரு பேரிழப்பிற்குப் பிறகு தீவிரமாகியிருக்கிறது.(கோவையில் நடந்த சம்பவம் அனைவரும் அறிந்ததே).வக்கிர உணர்வுகளுக்கு வடிகாலாய் இளம் பிள்ளைகளைக் காண்பவர்கள் வயது பேதம், பதவி பேதம், அந்தஸ்து பேதம் இல்லாமல் எங்கணும் பரவிக் கிடக்கிறார்கள்.

குழந்தைகளை அளவுக்கதிகமாக ஏற்றிச் செல்லும் வாடகை வாகனங்களில் இடநெரிசல் காரணமாய் ஓட்டுநர் மடியில் அமர்த்தப்படும் குழந்தைகள் தொடங்கி, நெரிசல் மிக்க பேருந்துகளில் பயணம் செய்யும் குழந்தைகள் வரை எல்லோருமே கணிக்க முடியாத பாதுகாப்பற்ற தன்மைக்கு ஆளாக வாய்ப்பிருக்கிறது.

அயல்நாடுகளில் பிள்ளைகளை தண்டிக்கும் பெற்றோர்களுக்கே தண்டனை உண்டு. மேலை நாடுகளில் இருந்து எதை எதையோ கற்றுக் கொள்கிற நாம், குழந்தைகளின் உரிமைகள் மற்றும் பாதுகாப்புக்கு அங்கிருக்கும் விதிமுறைகளில் பத்து சதமேனும் பின்பற்றினாலே போதும்.

ஏனெனில் இது குழந்தைகளுக்கான உலகம். ஒவ்வொரு வீடும் குழந்தைகளின் ராஜ்ஜியம். பூக்கள் பறவைகள், வண்ணங்கள், மலைகள் எல்லாமே குழந்தைகளுக்கான கடவுளின் ஏற்பாடுகள்.

பின்குறிப்பு : இந்த பதிவில் நான் பெறும் கருத்துக்கள் அந்த பிஞ்சுக் குழந்தைகளுக்கு சமர்ப்பணம்.